Akiliunneqarluni suliamik ingerlatsineq, eqqartuussisutigoortitsinermi ikiorteqarnissamut sillimasertarneq pisortallu inatsisitigut siunnersuiffiat pillugit paasissutissiineq

Eqqartuussinermi akiliutinut, misissuinermut, missingiussinermut advokatimullu akiligassanut aningaasartuutit eqqartuussivikkut suliassiissuteqarnermut atasut amerlasuutigut tamakkiisumik ilaannakortumilluunniit pisortanit akilerneqarsinnaapput imaluunniit sillimmasiisarfimmit illit nammineerlutit pigisanut/angerlasimaffimmut/ilaqutariinnullu sillimmasersimaninnut ilaallutik.

Akiutitilluni suliassiissuteqartarneq

Soorunami advokatippit sinnerlutit akiliutitillutit suliassiissuteqarniarninnut qinnuteqaat Naalagaaffiup Sinniisuanut nassiutissavaa.

Akiliutitilluni suliassiissuteqarnissamut piumasaqaatit akuerineqarsinnaavoq Naalagaaffiup Sinniisuata missingiuppagu suliap taamatut ingerlanneqarnissaanut naammaginartumik tunngavissaqartoq kiisalu kinguliini imm. 4-mi takuneqarsinnaasutut aningaasaqarnikkut piumasaqaataasut illit naammassisinnaagitit.

Ukiumi qaangiuttumi Akileraartarnermut Aqutsisoqarfiup ukiumoortumik nalunaarsuutai advokatinnut tunniutissavatit immaqalu katissimallugu aapparisappit/inooqatigisappit ukiumoortumik nalunaarsuutai kiisalu ilutigitillugu ilisimatitsissutigissavatit meeqqat nukangasut najugaqatigisatit qassiunersut. Aamma tunniuttussaavat sillimmasiisimaninnut uppernarsaatit, pequtinut/angerlarsimaffimut/ilaqutariinnullu sillimasiinermut atatillugu pilersinneqarsimasut assilinerat.

Eqqartuussisutigoortitsinermi ikiorteqarnissamut sillimmaserneq

Aammattaaq ilisimasariaqarpat pigisannut sillimmasersimaguit tassunga ilaasinnaammat eqqartuussisutigoortitsinermi ikiorteqarnissamut sillimmasersimaneq, eqqartuussisutigoortitsinermi ikiorteqarnissamut sillimasernerup ilaatigut ilagisinnaammagu eqqartuussisutigut sulianut aningaasartuutit akilerneqarnissaat. Eqqartuussisutigoortitsinermili ikiorteqarnissamut sillimasiinermi eqqartuussisutigut suliassat ilaat tassannga akiligassaaneq ajorput aamma piumasaqaataasarmat aningaasartuutit akilerneqassappata tamatumunnga tunngavissaq naammaginartutut nalilerneqarsimassasoq kiisalu advokatip suliamik ingerlatsinissani akuersissutigisimassagaa taamalu suliassaq sillimmasiisarfimmut nalunaarutigisimassallugu.

Malugiuk eqqartuussisutigoortitsinermi ikiorteqarnissamut sillimasiinermi matussutissatut atugassiissutit qanoq atsiginersut assersuutigalugu kr. 125.000-it. Nammineerlutit akiligassatit tassaagajuttarput taakku 10 %-ii, minnerpaamilli kr. 2.500-t.

Taamaattumik uppernarsaat advokatinnut takutittariaqarpat taassuma oqaluttuussinnaaniassammatit suliassiissutinni akiliutitinnissamut periarfissatit qanoq ittuunersut.

Pisortat inatsisitigut siunnersuiffiat

Advokatimit iluaqutissiuinermik suliaqartartumik apeqqutit inatsisiliornermut tunngasut pillugit siunnersorneqarnissamik ilitsersuunneqarnissamillu ujartuiguit eqqartuussisutigut suliassiissuteqarnermik kinguneqartussaanngitsumik, aningaasatigullu piumasaqaatit tassunga tunngasut naammassisimagukkit (takuuk imm.4) advokatilersornermi pisortat inatsisitigut siunnersuiffianni malittarisassat malillugit pisortanit tapiiffigineqarsinnaavutit.

Inatsisitigut siunnersuinermi nalinginnaasumi kr. 930-upput. Saqitsaassutaasumik suliassaqarpat imaluunniit immikkut tunngavilersukkamik pisariaqartitsisoqarpat pisortat inatsisitigut siunnersuineranni tapiissutit annertusineqarsinnaapput kr. 2.130 tikillugit. Suliassat ilaat pisortat inatsisitigut siunnersuinermut tapiissutinit akilerneqarneq ajorput. Assersuutigalugu suliat pillarneqarnissamut tunngasut imaluunniit akiitsunik isumakkeerfigineqarnissamut tunngasut aaqqissuussinermut ilaatinneqanngillat.

ISERTITANUT KILLISSARITITAASUT

Akiliutitilluni suliamik ingerlatsinissamut pisortallu inatsisitigut siunnersuisarnerannut tunngatillugu advokatilersornermi aningaasatigut killissarititaasut 1. Januaari 2010 allarnerfigalugu imatut aalajangersaaffigineqarsimapput:

Kisermaat kr. 280.000,00

Katissimasullutik aappariit/inooqatigiit kr. 356.000,00

Tapiissut meeqqamut ataatsimut kr. 49.000,00

Qitornanut 18-it inorlugit ukiulinnut tapiissutip annertussusia killilerneqarpoq kr. 49.000,00-nut, qitornaasoq qinnuteqartumi najugaqarpat/inatsisitigut siunnersorneqarnissamik qinnuteqartumi najugaqarpat imaluunniit qinnuteqartoq pilersuisuuneruppat.

Kisitsisitigut annertussusiliinerit inerneri katinneqartarput isertitat A-t aamma isertitat B-t katinnerisigut taakku 10.000 kr.-nik ilanngaallugit tunngaviusarporlu ukiup siuliani qanoq isertitaqarsimatiginermut nalunaarsuisimaneq, tassunga tapiliullugit Kalaallit Nunaanni selskabinit ukiumi pineqartumi iluanaarutaasimasut.

Inatsisitigut siunnersuisarfik IKIU uani nassaarisinnaavat

Inatsisitigut siunnersuisarfik IKIU imminut pigisoq

Kissarneqqortuunnguaq 9, 3900 Nuuk
Tlf. 324548, Fax 314548, ikiu@ikiu.gl, www.ikiu.gl