Advokatilersorneq qanoq akeqarpa?

Ilaasa aarleqqutigisarpaat advokatilersornerup akisunissaa immaqalu pisariunissaa. Taamaaliunngikkaannili kingorna suli akisuneruliinnarsinnaavoq.

Advokatit piumasarsuutigalugu akilersorneqarsinnaanngillat. Advokatilersornerup qanoq akeqarnissaanik malittarisassat assigiinngitsut arlaqarput. Assersuutigalugu naammaginartumik akeqartitsineq atuuttussaavoq advokatillu atuisunut tunngasut pineqartillugit nammineq akinut tunngasunik oqaluttuuttussaavaatit. Tamanna ajornakusoorpat advokatip paasitittussaavaatit pineqartuni pingaarnerni siunnersuinermik malitseqartussani qanoq akiliissanersutit.

Missingiussamik akunnermut akinik peqanngilaq

Advokatilersornerup akunnermut ataatsimut qanoq akeqarnissaa assigiissumik aalajangersagaanngilaq. Tamanna unammilleqatigiinnissamut malittarisassanut uniuuttissaaq. Unammilleqatigiinneq killilersugaanngitsumik ingerlasussaavoq – aamma akitigut. Akissaa qularutigigukku advokatit allaffiinut marlussunnut sianerlutit paasiniaasinnaavutit apeqqutigalugulu suliassap misissornissaa qanoq akeqassanersoq. Advokatit ilaasa siunnersuineq allanit akisunerutittarpaat, assersuutigalugu pineqartup iluani immikkut ilisimasaqartuugunik.

Aningaasaqarnerit pingaaruteqarpoq

Aamma imaassinnaavoq pissutsit atukkatit naapertorlugit akiliunneqarlutit sullinneqarnissannut imaluunniit inatsisitigut siunnersorneqarnissannut tunngavissaqartutit. Tamatuminnga advokatip siunnersorsinnaavaatit.

Advokatip akissarsisinnissaanut atorsinnaasunik sillimateqarpit?

Amerlanerpaat eqqartuussisutigoortitsinermi ikiorteqarnissamut sillimmasersimasarput suliani arlaqartuni advokatimut aningaasartuutissat annertunersaannut matussutaasussanik. Eqqartuussisutigoortitsinermi ikiorteqarnissamut sillimmasiineq ilaqutariittut sillimmasiinermeereertarpoq taamatuttaaq illumut, biileqarnermut angallateqarnermullu sillimmasersimanerneereertarluni.

Piffissat nukissatillu nammineq qanoq aningaasartuutigerusuppigit?

Naapertuilluartumik pisoqartariaqarpoq. Taamaattorli ilaanneeriarlutit nammineq eqqarsaatigisariaqarpat ajugaaniarninnut piffissaq nukiillu qanoq atsigisumik atussaneritit. Aamma pingaarpoq advokatimut akiliutissatut neqeroorutip naliliiffiginiarnerani siumoorlutit piareersimaffigissagakku suliamut qanoq piffissartortiginiarnerlutit nukinnillu qanoq atuiniarnersutit. Taamaattumik advokati oqaloqatigisariaqarpat suliassaq ataatsimoorlusi aaqqiiffiginiassagussiuk tamanna qanoq ilinnut piumasaqaateqassanersoq.